| Newsletter da l'avust 2026 dal Post spezialisà per il traffic betg motorisà |
| Temas actuals or dal mund dal traffic da peduns e da velos en il Grischun. |
 |
|
Dieta specifica Traffic betg motorisà, ils 29 d'october 2026 a Cuira |
|
|
|
Nov agid d'execuziun «planisaziun da la rait da sendas da mountainbike» |
|
|
|
Publicaziun dal Premi da promoziun da la Posta 2027 e dal Fond da la Mobigliar «Punts e piogns» |
|
|
|
Bike2school – uffants da scola pli sauns grazia a dapli moviment |
|
|
|
Annunziar serradas da sendas – per rutas da viandar, da mountainbike e da velo segiras |
|
|
|
Bike Kingdom Learning Lab – exempel da parada per la realisaziun locala da Fairtrail |
|
|
|
Updates dal project NPR «graubünden Trailrun» |
|
|
|
|
| Dieta specifica Traffic betg motorisà, ils 29 d'october 2026 a Cuira – s'annunziar ussa |
Ils 29 d'october 2026 ha lieu en la halla d'events Areon a Cuira la dieta specifica Traffic betg motorisà en il Grischun da quest onn. Sut il motto «Insieme – da l'idea fin a la realisaziun» pudais vus as allegrar sin inputs captivants, exempels pratics e discussiuns enturn ils temas coexistenza, promoziun dal traffic da peduns e da velos sco er sin projects progressivs dal Grischun.
Cun la cussegliera guvernativa dr. Carmelia Maissen (scheffa dal DIEM), Jürg Schmid (president da Grischun vacanzas), Luana Bergamin (presidenta da Swiss Cycling e deputada), Selina Nicolay (presidenta communala da Bever e deputada) e cun ulteriurs referents as spetgan differentas perspectivas sin sfidas e schanzas actualas.
La participaziun è gratuita, s'annunziar pon ins fin ils 20 d'october 2026.
Ulteriuras infurmaziuns ed annunzia |
|
|
| Nov agid d'execuziun «planisaziun da la rait da sendas da mountainbike» |
Il nov agid d'execuziun è vegni elavurà da SvizraMobila per incumbensa da l'Uffizi federal da vias UVIAS. El mussa, co che raits da sendas da mountainbike pon vegnir planisadas e sviluppadas vinavant e dat in'orientaziun en connex cun las dumondas davart il trassé, l'infrastructura, ils basegns d'utilisaziun sco er l'ir enturn cun conflicts d'utilisaziun potenzials.
En quest connex èsi central d'avair ina chapientscha cuminaivla da las noziuns e dals standards. Latiers tutgan per exempel ils tschintg stgalims da la scala da difficultad per trails da mountainbike sco er elements da signalisaziun novs e reelavurads. Quest document da basa concentrescha infurmaziuns praticas per ina planisaziun unitara e sustegna il barat tranter las persunas participadas.
Ulteriuras infurmaziuns e download |
|
|
| Publicaziun dal Premi da promoziun da la Posta 2027 e dal Fond da la Mobigliar «Punts e piogns» |
Premi da promoziun da la Posta
Ensemen cun sia partenaria, la Posta svizra, surdat l'uniun Sendas svizras il Premi da promoziun da la Posta 2027. Il premi conceda mintg'onn daners da promoziun per projects da sendas da viandar e da nov er da sendas da viandar d'enviern.
Premissas per il premi da promoziun da la Posta: Ils projects da sendas da viandar ston esser il matg 2027 en ina fasa da construcziun tempriva e vegnir terminads fin il zercladur 2028. Ils projects da sendas da viandar d'enviern duain avair (novas) signalisaziuns ed esser transibels fin il pli tard il 1. da november 2027. L'ultim termin per l'inoltraziun è ils 31 d'avust 2026. Ils projects èn d'inoltrar sur la pagina d'internet.
Ulteriuras infurmaziuns ed annunzia
Fond da la Mobigliar «Punts e piogns»
En il rom da ses partenadi cun las Sendas svizras surdat l'assicuranza Mobigliar contribuziuns da promoziun or da ses fond «Punts e piogns». Las contribuziuns servan per sanar e per construir punts e piogns sin la rait da sendas da viandar. L'ultim termin per l'inoltraziun è ils 31 d'avust 2026. Ils projects èn d'inoltrar sur la pagina d'internet.
Ulteriuras infurmaziuns ed annunziaInfurmaziun
Infurmaziun
Ultra da projects da construcziun da sendas da viandar vegnan da nov er sustegnids concepts, planisaziuns ed analisas che gidan sistematicamain a meglierar la qualitad da las sendas da viandar, sco er projects da signalisaziun da sendas da viandar d'enviern e d'ir cun gianellas. |
|
|
| Bike2school – uffants da scola pli sauns grazia a dapli moviment |
L'acziun Bike2school (acziun d'atun) animescha las scolaras ed ils scolars da far il viadi a scola cun velo, e quai durant 4 emnas che pon vegnir tschernidas libramain tranter ils 3 d'avust ed ils 22 da november 2026. Ils effects positivs da l'ir cun velo èn evidents: Ir cun velo promova la buna furma, è bun per l'ambient e fa simplamain plaschair! Classas dal chantun Grischun sa participeschan gratuitamain a la concurrenza. As annunziai a partir d'immediat fin ils 22 d'october 2026.
S'annunziar e survegnir ulteriuras infurmaziuns sut Bike2school | acziun d'atun. |
|
|
| Annunziar serradas da sendas – per rutas da viandar, da mountainbike e da velo segiras |
Serradas da sendas e sviaments èn infurmaziuns impurtantas per tut las persunas che utiliseschan las sendas da viandar e las rutas da mountainbike e da velo. Questas infurmaziuns èn necessarias, sch'ina senda è pervia d'eveniments da la natira, da donns, da plazzals, da tagl da laina, d'occurrenzas u d'auters privels betg pli transibla u charrabla. En il cas normal duai vegnir signalisà in sviament adattà.
Per serradas da vias e sviaments è responsabla la vischnanca da staziunament respectiva. Per che las serradas possian vegnir registradas e communitgadas sur ils chanals online usitads en furma actuala, ston quellas vegnir annunziadas uschè baud sco pussaivel. En il Grischun duain las communicaziuns davart sendas da viandar, da mountainbike e da velo vegnir annunziadas per e-mail a technik@wwgr.ch. Per motivs dal sistem èsi mo pussaivel da registrar serradas che duran pli ditg ch'ina emna. Grazia fitg per il sustegn per garantir ina rait da sendas segira ed attractiva.
Qua vai tar il formular da registraziun |
|
|
| Bike Kingdom Learning Lab – exempel da parada per la realisaziun locala da Fairtrail |
Il zercladur ha il Bike Kingdom Planeiras extendì il skillcenter existent tar la staziun da val dal Rothorn al Bike Kingdom Learning Lab. Questa purschida ch'è unica per la Svizra, cumbinescha tecnica dad ir cun velo e sensibilisaziun en moda ludica e perceptibla. Uffants e giuvenils emprendan d'esser en gir en moda segira, respectusa e bain preparada en il Bike Kingdom.
Fairtrail ha accumpagnà d'emprim ennà il project, furnì basas specificas per ils elements da sensibilisaziun e sustegnì finanzialmain la realisaziun. Il Learning Lab è vegnì realisà da la LMS SA ensemen cun divers partenaris locals. Resultada è ina purschida ferma ed autentica che va a prà cun il Bike Kingdom e che renda perceptiblas las valurs da Fairtrail. Dapli davart quest tema datti en il blog.
Pertge ch'il Bike Kingdom collavura cun Fairtrail, declera il manader da projects Ruedi Gertsch en quest curt video.
Nus envidain las autras regiuns da medemamain adaptar Fairtrail regiunalmain. Dapli infurmaziuns datti qua. |
|
|
| Updates dal project NPR «graubünden Trailrun» |
Ulteriur svilup da la trailtrophy
La trailtrophy collia il trailrunning cun la gamification e renda perceptibla en moda ludica la diversitad dals trails grischuns. Las participantas ed ils participants rimnan kilometers, meters d'autezza e scuvran differents caracters da trails – mintgina e mintgin en lur agen tempo.
Destinaziuns e purtaders da prestaziuns profiteschan d'ina visibladad pli gronda da lur purschidas sco er d'ina plattafurma che motivescha ils giasts da scuvrir novas regiuns e d'esser pli ditg en gir en il Grischun. Dal rest renda la trailtrophy er visiblas e perceptiblas las valurs fundamentalas dal «graubünden Trailrun».
Qua vai tar la registraziun
Fotografia: Egelmair Photography |
|
|
| © 2026 Uffizi da construcziun bassa, Traffic betg motorisà. Tut ils dretgs resalvads. |
|
|
